# رأيي وأنا حرة فيه #

 # رأيي وأنا حرة فيه #

كلنا بنمر بمشاكل منها اللي بنقدر نحله بعد فترة قصيرة ومنها اللي بنحاول نعافر ونتعب لغاية ما نلاقي حل او نعرف ننهي المشكلة دي بشكل على قد ما صحي ومفيد ومنها مشاكل لازم يكون فيها حد كبير او حد يصلح ونعرفه زي ما ربنا قال ﴿ وَإِنْ خِفْتُمْ شِقَاقَ بَيْنِهِمَا فَابْعَثُوا حَكَمًا مِّنْ أَهْلِهِ وَحَكَمًا مِّنْ أَهْلِهَا إِن يُرِيدَا إِصْلَاحًا يُوَفِّقِ اللَّهُ بَيْنَهُمَا ۗ إِنَّ اللَّهَ كَانَ عَلِيمًا خَبِيرًا﴾[ سورة النساء: 35] واهم حاجة نسمع ونواجهه بين أطراف المشكلة سواء زوج وزوجة .. اب وابنه ... زملاء عمل .. اصدقاء وهكذا 

لكن اللي بشوفه وخصوصا على وسائل التواصل الاجتماعي غير كده وغالبا بتنشر تحت عضو مجهول الهوية قال بكده محدش ها يعرفهم وفي عرض المشكلة ناقص تكتب عنوان البيت دا إذا ماكانتش المشكلة ... فييك... علشان تزود تعليقات 

المهم أن فيه ناس ناشرين أنهم ممكن يحلوا المشاكل وطبعا الاعلان ممول تعالي نحل لك مشكلتك ... فضفضي معرفش مع مين ... بوحي بمشاعرك بلا خوف .. وطبعا الكلام موجهه أغلبه للسيدات لأن السيدات كما قال استاذي شريف الحسيني أبوفرحة الستات هي أكثر شكوى من الرجل 

# المهم وماعلينا #

أن فيه فعلا ستات أو بنات بتصدق وبتنساق ورا المواقع دي .. أنا عارفة انك مضغوطة وعايزة حل لكن ازاي تأمني لحد من غير ما تعرفيه شخصيا 

ماشي .. ها نقول الاعلانات فيها مراكز استشارات عال جدا يبقى نبحث عن سمعة المركز دا والناس اللي فيه ونعرف هل هم مؤهلين ؟! هل بيحتفظوا بالسرية في المواضيع اللي بتعرض عليهم ؟

المراكز المحترمة بتعمل اعلان ولها مكان معروف حتى لو الاستشارة على التليفون بتحصل على الأقل مقابلة للتعارف الشخصي 

# نصيحة ... وانت حرة تاخدي بها ولا لأ#

فكري في مشكلتك ها تلاقي فيه مشاكل في الاول تبقى كبيرة لكن لما تهدي وتصلي ركعتين لله بنية قضاء الحاجة ها تتحل وانت بتشربي كوباية الشاي 

المشاكل الكبيرة عايزة حد كبير من العائلة يكون شخص حكيم محايد عاقل في نيته الإصلاح 

معندكيش حد ماشي مكاتب الاستشارات المحترمة والمسؤولين عنها فاهمين وواعيين ومهنيين وعلى علم دوري وهاتلاقي 

# اخر حاجة #

ياريت اللي ينشر مشكلة ويطلب الآراء من حقه محدش يعرف مين هو أو مين هي ... وبرضه ممكن المشكلة البسيطة بالنسبة له مشكلة كبيرة فروق في قدرات التحمل ومواجهة المشاكل

من الآخر ما تنشريش مشكلة اخو جوزي بصلي من فوق لتحت 

ولا اخت جوزي غيرانه من لون شعري 

ولا حماتي بتغير مني علشان انا اصغر منها 

# يارب # نفهم #