وجهة نظر على جروبات الفيس

 # وجهة نظري وانا حرة #

مشتركة في اكتر من جروب من الجروبات النسائية بدخل أتصفح الجروب واقرا المنشورات والتعليقات يعني بحاول استفيد من الآراء أو اعرف المشكلات اللي بتواجه الأسر والمجتمع والمرأة بصفة خاصة بصفتي استشاري أسري المهم طلعت ببعض النتائج المؤسفة اللي لقيتها في بعض الجروبات ... وبقول بعض علشان محدش يسيب غرضي الأساسي من الكتابة ويمسك في التعميم والتخصيص

# المهم #

١. بعض الجروبات دي بتشتري جروب جهاز بعدد المتابعين يعني تلاقي الجروب عمره شهر او تلاتة أو حتى سنة وتلاقي الاعضاء ١٣٩ الف أو ١٤٠ الف ... طبعا من المنشورات والتفاعل بتعرف الجمهور الحقيقي 

٢. وضع بعض المشكلات الغير صحيحة والغريبة لإثارة حفيظة القراء فتحصل نرفزة فتكتر التعليقات واللايكات 

٣. عضو مجهول الهوية ودا أنا في رأيي مصيبة لأن اي حد بيدخل بيكتب اي كلام ويتطاول على اي تعليق لانه مش معروف 

٤. اذا طلب العضو مراجعة التعليق من الادمن المحترمة تلاقي رد الادمن ينضح بما أنهم اللي كاتبين المنشور دا علشان برضه التعليقات 

٥. للاسف التصرفات الشاذة والغير مسؤولة وكمان التطاول بقى وسيلة للشهرة والإنسان المحترم بقى هو المدان دائما 

# نصيحة لادمن الجروبات دي #

# وتاخدي بها أو لا مش مهم #

ها تنجحي وتجمعي ليكات وتعليقات وتركبي التريند ... لكن شوية شوية ها ينسحب بساط التريند من تحتك لأن ها يكون فيه تريند تاني ها يغطي عليكي 

وتطاولك على الأعضاء ها يخلي الأعضاء الموجودين فعلا يخرجوا من جروبك الغير محترم 

وعلى آخر الزمان أن مثل هذه الجروبات تهاجم التعليق المحترم أنه من مساوئ النت ... وعجبي

اذا كان التعليق المحترم من مساوئ النت فمثل هذه الجروبات كارثة الكوارث

# تحيه وتقدير # 

أخيرا تحية وتقدير الجروبات النسائية المحترمة اللي بتهتم بالحقيقة والصدق والفاعلية الحقة وتتقبل التعليقات المحترمة ... الجروب النسائي اللي انا موجودة فيه للان تحية وتقدير وكل الاحترام للادمنز